Department of Architecture Forum - Assiut University


 
بوابة المنتدىالرئيسيةمكتبة الصورس .و .جبحـثالتسجيلدخول

شاطر | 
 

 كل يوم قصيدة ...

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
archi
.
.


ذكر
عدد المساهمات : 318
العمر : 32
بلدك : الغردقة
المستوى التعليمي : متخرج
جنيه مصري : 2921

مُساهمةموضوع: كل يوم قصيدة ...   07/01/09, 11:42 am

قصيدة اليوم ..
حكاية عباس

للشاعر أحمد مطر

عباس وراء المتراس

يقظ منتبه حساس

منذ سنين الفتح يلمع سيفه
و يلمع شاربه أيضا

منتظرا محتضنا دفه
بلع السارق ضفة

قلب عباس القرطاس
ضرب الأخماس لأسداس

بقيت ضفة
لملم عباس ذخيرته و المتراس

و مضى يصقل سيفه
عبر اللص إليه وحل ببيته
أصبح ضيفه

قدم عباس له القهوة
و مضى يصقل سيفه

صرخت زوجته عباس
أبنائك قتلى عباس
ضيفك راودني عباس
قم أنقذني ياعباس

عباس وراء المتراس
منتبه لم يسمع شيئا
زوجته تغتاب الناس

صرخت زوجته عباس
الضيف سيسرق نعجتنا

عباس اليقظ الحساس
قلب أوراق القرطاس
ضرب الأخماس لأسداس

أرسل برقية تهديد !!

فلمن تصقل سيفك يا عباس
لوقت الشدة

اصقل سيفك يا عباس !!

( طبعا مين عباس ؟؟ هو مش قصده محمود عباس ابو مازن !! بس !! )
الرجوع الى أعلى الصفحة اذهب الى الأسفل
archi
.
.


ذكر
عدد المساهمات : 318
العمر : 32
بلدك : الغردقة
المستوى التعليمي : متخرج
جنيه مصري : 2921

مُساهمةموضوع: رد: كل يوم قصيدة ...   08/01/09, 12:43 am

قصيدة النهاردة
عن موضوع الفول واللحمة
لاحمد فؤاد نجم

عن موضوع الفول واللحمة صرح مصدر قال مسئول

ان الطب اتقدم جدا والدكتور محسن بيقول

ان الشعب المصري خصوصا من مصلحته يقرش فول

حيث الفول المصري عموما يجعل من بني ادم غول

تأكل فخده في ربع زكيبه والدكتور محسن مسئول

يديك طاقة وقوة عجيبة تسمن جدا تبقى مهول

ثم اضاف الدكتور محسن ان اللحمه دي سم أكيد

بتزود أوجاع المعدة وتعود على طولة الايد

وتنيم بني ادم وتفرقع منه المواعيد

واللي بياكلوا اللحمة عموما حيخشوا جهنم تأبيد

يادكتور محسن يامزقلط يامصدر ياغير مسئول

حيث ان انتو عقول العالم والعالم محتاج لعقول

مارأى جنابك وجنابهم فيه واحد مجنون بيقول

احنا سيبونا نموت باللحمة وانتو تعيشوا وتاكلوا الفول


مارأيك ياكابتن محسن مش بالذمة كلام معقول
الرجوع الى أعلى الصفحة اذهب الى الأسفل
archi
.
.


ذكر
عدد المساهمات : 318
العمر : 32
بلدك : الغردقة
المستوى التعليمي : متخرج
جنيه مصري : 2921

مُساهمةموضوع: رد: كل يوم قصيدة ...   08/01/09, 08:30 am

محكمة
لاحمد فؤاد نجم

اسمع و شوف ماحصل

برضه السمع واجب

قاضي المظالم وصل

و اتأكد الحاجب

غمز بعينه لمره

وراح مكسكس ورا

القاضى قال محكمه

و هو قال مجزرة



مع انه كان قبلها بدقيقة

عامل عون

نازل شتيمة وأذى

ف عساكر الكركون

مجعوص بيقرا الصحف

و يرد ع التلفون

ويمر من وسطنا

و كأنه نابليون



و فجأة فز اتنتر

واقف على حيله

كرشه الجسيم انهطل

أنا قلت دا ديله



قول حبتين و اتنصب

باسم العدالة ميزان

مدموغ بكلمة شرف

مش كلمة السلطان

ممكن يشيل الهرم

و ينخ من شعره

حسب الظروف و العلل و الرك ع الوزان



أول قضية شطح سمى الرعية جاموس

تاني قضية نطح قال ع الضحيه جاسوس

تالت قضية و أنا ف الأصل راجلها

سألني ايه تهمتك ؟

أنا قلت أجلها

لما الميزان ينصلح

و يلاقي وزانه

و من الصباح للمسا

ربك يعدلها

معتقل القاهره /1970
الرجوع الى أعلى الصفحة اذهب الى الأسفل
nada aly
مشرف سابق
مشرف سابق


انثى
عدد المساهمات : 1563
العمر : 27
بلدك : Egypt
التخصص : طالب في قسم العمارة
المستوى التعليمي : دفعة 2011
جنيه مصري : 5466

مُساهمةموضوع: رد: كل يوم قصيدة ...   09/01/09, 12:40 pm

موضوع جامد يا بشمهندس

ياريت تستمر في كتابة كذا قصيدة وتبقى مجموعة كبيرة وياريت تكون للشاعر احمد فؤاد نجم الراجل ده رائع بجد
الرجوع الى أعلى الصفحة اذهب الى الأسفل
archi
.
.


ذكر
عدد المساهمات : 318
العمر : 32
بلدك : الغردقة
المستوى التعليمي : متخرج
جنيه مصري : 2921

مُساهمةموضوع: رد: كل يوم قصيدة ...   10/01/09, 07:49 am

كلمتين ( إلى مصر )
برضه لاحمد فؤاد نجم

كل عين تعشق حليوة

و إنتي حلوة في كل عين

يا حبيبتي أنا قلبي عاشق

و اسمحيلي بكلمتين

كلمتين يا مصر يمكن

هما أخر كلمتين

حد ضامن يمشي آمن

أو مِـآمن يمشي فين

..........................

شابة يا أم الشعر ليلي

و الجبين شق النهار

و العيون بحرين أماني

و الخدود عسل و نار

و اللوالي ( اللؤلؤ) بابتسامتك

يحكوا أسرار المحار

يللي ساكنة القصر عالي

إيمتى يهنالي المزار

كلميني يا صبية

طال علي َّ الانتظار

كلمتين يا مصر يمكن

هما أخر كلمتين

حد ضامن يمشي آمن

أو مِـآمن يمشي فين

.....................

قصرك المسحور غيلانو

أغبى من دود الغيطان

بعد مص الغصن الاخضر

ينحتوا عضم العيدان

و اللي خلى الارض خضرا

و اللي خلى الدار آمان

عاش بجور ملو جوفه

مات بخوفه من الغيلان

طوّع الغلبان

ما قالش عن شقا العمر اللي كان

كلمتين بمصر يبقوا

هما أخر كلمتين

حد ضامن يمشي آمن

أو مِـآمن يمشي فين

....................

أدي كلمة من عذابي قلتهالك

باقي كلمة

من حنيني صنتهالك

في الضلوع من دنيا ظلمة

كنت خايف يلمحوها

يقتلوها في سكة ظلمة

سقسقت و النور بشاير بشاير

زهرة الصبار يا سلمى

يا نسيم الشوق يا طاير يا طاير

خد لمصر في الصبح كلمة

طول ما يبقى الركب ساير

بالبصاير و العينين

يبقى ضامن يمشي آمن

يبقى عارف يمشي فين
الرجوع الى أعلى الصفحة اذهب الى الأسفل
archi
.
.


ذكر
عدد المساهمات : 318
العمر : 32
بلدك : الغردقة
المستوى التعليمي : متخرج
جنيه مصري : 2921

مُساهمةموضوع: رد: كل يوم قصيدة ...   10/01/09, 07:53 am

بقرة حاحا
برضه احمد فؤاد نجم
........



ناح النواح و النواحة

على بقرة حاحا النطاحة

و البقرة حلوب .. تحلب قنطار

لكن مسلوب .. من أهل الدار

و الدار بصحاب .. و حدعشر باب (11 باب )

غير السراديب .. و بحور الديب

و غيلان الدار .. واقفين بنهار

و ف يوم معلوم ... عملوها الروم

زقوا الترباس ... هِربوا الحراس

دخلوا الخواجات .. شفطوا اللبنات

و البقرة تنادي .. و تقول يا ولادي

و ولاد الشوم ... رايحين ف النوم

البقرة انقهرت .. م القهر انصهرت

وقعت بالبير .. سألوا النواطير :

طب وقعت ليه ..؟

وقعت م الخوف

و الخوف يجي ليه .. ؟

من عدم الشوف



و قعت م الجوع و م الراحة

البقرة السمرا النطاحة

ناحت مواويل النواحة

على حاحة و على بقرة حاحا
الرجوع الى أعلى الصفحة اذهب الى الأسفل
archi
.
.


ذكر
عدد المساهمات : 318
العمر : 32
بلدك : الغردقة
المستوى التعليمي : متخرج
جنيه مصري : 2921

مُساهمةموضوع: رد: كل يوم قصيدة ...   10/01/09, 07:57 am

هنا شقلبان
احمد فؤاد نجم


بيان هام

هنا شقلبان

محطة اذاعة حلاوة زمان

من القاهرة ومن كردفان

وسائر بلاد العرب واليابان

ومن فنزويلا أيضا ايران

ومن اى دار

أو بلد مستباحه

بفعل السياحه مع الأمريكان

هنا شقلبان

محطة اذاعة حلاوة زمان

نقدم اليكم بكل اللغات

مراسح وسيما وجميع الفنون

صحافه ومنابر وتلفزويونات

وخطبا ف جوامع وجبنه وزيتون

ونقزح ونركب جميع الموجات

ونبحث ونفهم فى كل الشئون

ودايما نلعلع فى كل الحالات

ولا حد سامع ولا يحزنون

وتسمع ما تسمع دا ما يهمناش

لأن احنا اصلا بناكل بلاش

فخليك فى نفسك وما تخليناش

نسلط عليك القلم واللسان

هنا شقلبان

محطة اذاعة حلاوة زمان

يسر الذاعه ولا يسركوش

بهذى المناسبه ولا بندعيكوش

نقدم اليكم شحاته المعسل

وبدون الرتوش

شبندر سماسرة بلاد العمار

معمر جراسن للعب القمار

وخارب مزارع و تاجر خضار

وعقبال أملتك أمير الجيوش

ما تقدرش تنكر

تقول ما اعرفوش

ما تقدرش ايضا تفول ما أسمعوش

شحاته المعسل حبيب القلوب

يزيل البقع ولاهموم والكروب

يأنفس يأفين يبلبع حبوب

ويفضل يهلفط ولا تفهموش

وتفهم ما تفهم دا ما يهمناش

لأن انت فاهم وعامل طناش

ح تنكر وتحلف ح اقول لك بلاش

ح تتعب دماغنا وتتعب كمان

هنا شقلبان

محطة اذاعة حلاوة زمان

لأن المخبى ظهر واستبان

وكل المسائل بدت للعيان

وطلعت حكاوى ونزلت كمان

عن التهريبه وعن كيت وكان

وعن محسوبيه وعن ألعبان ( بضم الالف)

ظهر فى المدينه كأن الطوفان

وغرق مراكب وسوح غيطان

وبعض المراكب ح تغرق كمان

وأزمة مساكن وأزمة أمان

وعالم بياكل فى عالم جعان

وريحة مؤمره فى جو المكان

مخطط خيانه مع الأمريكان

لدبح العشيره وحرق المكان

وفيه ناس بترغى ولازم بيان

كما ابلغونا جميع الودان

لهذا وذاكا وتلكم كمان

نقدم اليكم عروسه وحصان

شحاته المعسل وهذا البيان

هنا شقلبان

محطة اذاعة حلاوة زمان

بسم الله

سلام عليكم وسلمون وموز

وأما المسائل فهنجف ولوز

فيا اخوتى ويا أخوات

اليكم بيانى كما هو آت

جميع المسائل تمام التمام

وكل الكلام دا مجرد كلام

فصبرا جميلا ولا تقلقوش

وشغل الضغاين أنا ما أقبلوش

ما فيش أى حاجه

على الطلاق والعتاق بالتلاته

ما فيه اى حاجه

وقدر كمان ان فيه أى حاجه

ما لوش أى لازمه الكلام واللجاجه

وعيب ان عيل يسوق السماجه

ويعمل لى باللو ويعمل ديباجه

آنا بطبعى ضد السماسره الكبار

بحكم المنافسه وحكم الجوار

لكن مش فى طبعى

انى أعمل فضيحه

لواحد زميلى هبش كام صفيحه

ما كل الزمايل بتهبش صفايح

وكل اللى جاى مش زى اللى رايح

فيا ايها الشعب صهين تفلعص

مساء التنفس مساء الروايح

أخويا الامير بزرميط الايرانى

بعت لى السنه دى

عزمنى ودعانى وأنا قبلت طبعا

ورحنا العزومه وكانت وليمه

ما تحصلش تانى دا أيه المحمر

وأيه المكمر وايه المشمر

وايه الصوانى

وانا دماغى تعبت ولفت صراحه

من الفخفخه والهنا الاصفهانى

هناك يعنى مثلا اذا شربت طافيه

تمز بكوارع وبسطرمه ضانى

ما شفتش هناك

ناس بتحقد عليهم

ولا ناس بتشتم فلان الفلانى

لأنه اشترى عزبتين من شطارته

وحكمة ادارته وطلع مبانى

وبعد الوليمه استلمنا الهدايا

مفضض ومدهب وقز وقيشانى

وطبعا أخويا الأمير قال لى حاجه

ح اقولهالكو طبعا اذا الوقت ناسب

ح يطلع لى عيل بدون اى حاجه

ويعمل لى فلحس ويقعد يحاسب

دا حقد اشتراكى أنا ما أقبلوش

ولو هو ابنى أنا ما اعتقوش

كلام عن سماسره كلام عن دعاره

حاجات مش صحيحه جمل مستعاره

وعايزين يخلوا البلد اردغانه

وعايزنى اسيب البلد من زمان

وأنا مش ح اسلم واسيب الأمان

ولا بالبوليس والنيابه كمان

فيا ايها الشعب كمل جميلك

وصبرا واذلم حتيجى المصارى

وتاكل وتشرب تبع ما يآتيلك

وتغرق فى بحر العبيد والجوارى

وترسم حياتك حسب ما يرائيلك

ونملا الحوارى فساقى وقصارى

تسبح بحمدك وتشكر جميلك

وفضل الزباله وطفح المجارى

ختاما سلاما وآخر كلاما

ضرورا

يسود الهدوء والوئام فماذا والا

ح طربقها واللا اهرب فلوسى

واسافر قواما سلام عليكم

وسلمون وموز بصفتى رئيسا

وابا وجوز

القاهرة /1967
الرجوع الى أعلى الصفحة اذهب الى الأسفل
archi
.
.


ذكر
عدد المساهمات : 318
العمر : 32
بلدك : الغردقة
المستوى التعليمي : متخرج
جنيه مصري : 2921

مُساهمةموضوع: رد: كل يوم قصيدة ...   10/01/09, 08:08 am

كلب الست
احمد فؤاد نجم


فى الزمالك
من سنين
وف حما النيل القديم
قصر
من عصر اليمين
ملك واحدة من الحريم
صيتها اكتر م الادان
يسمعوه المسلمين
والتتر والتركمان
والهنود والمنبوذين
ست فاقت ع الرجال
فى المقام والاحترام
صيت وشهره وتل مال
يعنى فى غايه التمام
قصره يعني هى كلمة
ليها كلمه فى الحكومه
بس ربك لجل حكمه
قام حرمها م الامومه
والامومه
طبع ثابت
جوه حوا من الزمان
تعمل ايه الست
جابت
فوكس رومي وله ودان
فوكس دا عبقال املتك
عندة دستة خدامين
يعنى مش موجود فى عيلتك
شخص زية يا اسماعين
واسماعين دا يبقى واحد
م الجماعة التعبانين
اللي داخوا فى المعاهد
والمدارس من سنين
حب يعمل واد فكاكة
يمشي حبة فى الزمالك
والقيامة والفتاكة
يرموا طبعا ع المهالك
عم سمعة من قيامتة
حب يعمل فيها فلة
بعد ما الوظ بيجامتة
اشترى حتة مجله
قول مشي يقرا فى حكاية
من حكايات الغرام
واندماجة فى القرايه
خلا مشيه مش تمام
ع اليمين يحدف بعيد
خطوتين ويروح شمال
لمحه فوكس من الحديد
قال دا صيد
سهل حلال
هب نط فى كرشه دوغري
جاب بيجامته لحد ديلها
اسماعين بدال ما يجري
قال يا رجلي
رجلى مالها ؟
بص شاف الدم سايح
من عاليها ومن واطيها
وياللى جاي
وياللي رايح
المجله مش لا قيها
حبه واتلموا الظنايا
اللى هما البوابين
والحكايه والروايه
قال لهم
دا كلب مين
كلب مين
ما كلب مينشى
سمعه لبخ حبتين
قال واحد منهم
امشى
اللى جابك عنده مين؟
قال دا شارع يا مواشي
والجميع بيمر منه
اللى راكب
اللى ماشى
مستحيل نستغنى عنه
كلمه من دا
وكلمه من دا
ظاطو واترسمت فضيحه
قول نهايته
القصد من دا
اسماعين اكل الطريحه
راحو قسم الشرطه طبعا
والنيابه كفيله بيهم
واترموا فى الحجز جمعا
لما ييجي الدور عليهم
حبة والشاويش امين
قال : سعيد النقشيندي
قام غريم عم اسماعين
قال لة:
محسوبك يا افندي
قام سي سمعه
يروح معاه
الشاويش قال :
غور بدمك
راح تعوصنى
وفوق قفاه
كف طرقع
داهيه ف امك
تفتكر يفضل سي سمعه
قد ايه فى القسم نايم ؟
استضافه الحجز جمعه
يا بلاش
ادي العزايم
شاف بلاوي
ما تتحكيش
م الديابه المسجونين
قال يا عالم
يا شاويش
يا نيابه
يامسئولين
خلصوه بعد المناهده
جثه من جحر الديابه
هى يمكن ساعه واحده
كان فى مكتب النيابه
قال له مالك يااسماعين
قال لة زي البمب ... مالي ؟
قال له عضك فوكس فين
قال له سيبنى اروح لحالي
انت شوف سي فوكس يمكن
خد تسمم
غصب عني
الوكيل قال برضة ممكن
والشاويش
قعد يغنى
انت فين والكلب فين
انت قدة يا اسماعين
طب دا كلب الست يا ابني
وانت تطلع ابن مين
بشري لصحاب الديول
واللى له اربع رجول
بشرى لسيادنا البهايم
من جمايس او عجول
اللى صاحبه يا جماعه
له غناوي
فى الاذاعه
راح يدوس فوق الغلابه
والنيابه .. بالبتاعه
الرجوع الى أعلى الصفحة اذهب الى الأسفل
 
كل يوم قصيدة ...
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
Department of Architecture Forum - Assiut University :: المنتديات الجـــــــــــــــادة :: قسم المواضيع الجاده والعامة-
انتقل الى: