ما رأيكم في امتحان القوانين والتشريعات

سمعت والله........... سمعت باللي حصل

ونفس اللي حصلنا امبارح في الاسكان امبارح

ونفس اللي هيحصل لنا في التخطيط الترم التاني

ههههههههههههههههههههههههههههههههههههههههه
ههههههههههههههههههههههههههههههههههههههههه

السلام عليكم ورحمة الله وبركاته
شكرا يا باشمهندس على اهتمام حضرتك بالمادة والاطمئنان على الطلبة اللى حضرتك كنت بتدرسلهم فى السكاشن
انا اصلا سنة رابعة
بس بصراحة شوفت الامتحان
هو اه طويل و اغلبه نظرى
بس مش ده اللى مخليه صعب
لان لازم يكون فى سؤال او اتنين على الاقل بيقيس مستوى الطالب ويفرق بين الطالب المتميز والطالب العادى
فانا شايفة انه امتحان كويس بصراحة
و اغلب الطلبة جاوبت كويس وكويس جدا كمان بس مش الكل بيبين كده

ماشي يا أحمد محرم
مصيري هاراقب عليك تاني
وساعتها مش هأثق فيك ببصلة
وساعتها هيبقي فيه تفتيش ذاتي
وهاخليك تحل علي البلاط في صالة رابعة لوحدك
وابقي قابلني لو عرفت تحل

ههههههههههههههه
احسن احسن
.
.
.
طب يا باشمهندس ممكن حضرتك تقول رأيك فى الامتحان نيابة عن طلبة سنة تالتة الكتييييييييييييييييييييييير
اللى بتدخل المنتدى

انا ا قولك احنا وصلنا رابعه ازاي يا احمد مع ان انا لم اغش خالص لان اصلا مفبش حاجه تستاهل ان الواحد يغشش غشانها
اول حاجه الفكر المميز اللي ماشي بيه القسم ادى الى تطور الفصيص الايمن من الدماغ وقام بعمليه تنشيطه فتحولت من انسان فاهم الى بغبغان غبي بس اي دونت كار , لان مدام الهرم مقلوب اعتقد مش فارقه انك واقف في قمته او قاعه و او بمعنى اصح كانك واقف في دايره ومش عارف تقف في اي ركن , خلاصه الكلام التكرار بيعلم الحمار
تاني حاجه السكاشن الممتعه جدا ذات الاربع ساعات الممتعه جدا قامت بالقضاء على الفصيص الايسر تماما ونهائيا
المنهج العلمي الثابت من ايام جدو خفرع ومنقرع و مينا موحد القطرين
الدراسه باللغه العربيه اللي لها اكبر الاثر على تنميه المستوى العلمي
عدد الساعات العمليه اللى اكتر بكتير من النظريه و التي ادت الى بلوره الافكار والمنهج السليم
دي اسباب خلت الواحد يوصل لسنه رابعه وهو مطمن
على راي صاحبنا
اصحى ياهرم وفوق دنتا واقف ع بوزك
حاسب من الريشه تقف عليك وتنقطم رقبتك وينكسر بوزك
اصحى ياهرم و فوق و افردلنا بوزك
طلع خبايك متعنا بكنوزك
دا لولا العوزه مكنتش بصيت انا ف بوزك

نحن نتقدم بابداء الرأي الحر مع احترام الرأي الاخر

ههههههههههههههههههههههههههههههههههههههههههه هههههههههههههههههههههههههههههه لالالا تعلييق بس سمعت ان الامتحان صعب وفعلا اغمى على البعض منهم

ههههههههههههههههههههههههههههههههههههههههههههه
ايه الثقافة العليا دى
.
.
.
.
يا تغ هو صعب اه بس قلة قليلة اللى قالت كده والباقى حل كويس والله بس مش مبينين ده معرفش ليه
يمكن احتراما لظروف زمايلهم اللى محلوش كويس
وكمان شوفى الامتحان بجد واحكمى عليه انتى بنفسك
هتلاقيه بيقيس مستوى الطالب عموما
وبيفرق بين الطالب المتميز والطالب العادى
شوفيه وابقى قوليلي رأيك

طبعا أنا باشكر كل اللي شارك برأيه في هذا الموضوع.
علي فكرة انا كنت باراقب علي هذا الامتحان بالصدفة.
وبالفعل كان في البعض شبه منهار.

أما بالنسبة لرأيي:
من وجهة نظري ان الامتحان كان كله تقريبا نظري ولا يوجد شئ تطبيقي (تمرين مثل اللي أخذوه الطلاب في السكشن) لكي يقيس مدى فهم الطالب للنظري من خلال التطبيق.
وبالتالي من الممكن أن يحصل طالب علي درجة كويسة جدا في الامتحان نتيجة لقدراته في الحفظ ولكن هذا لا يقيس مدي فهمه الجيد للمادة من خلال التطبيق.
وعلي فكرة معظم الطلاب حلوا كويس.

علي فكرة أحمد محرم كان بيمتحن مادة اساسات في نفس اللجنة
وكان عامل فيها الواد البريمو اللي مقطع الامتحان
وأدينا هنعرف من النتيجة مين اللي كان مقطع التاني - الامتحان ولا أحمد.

مع أطيب تحياتي لاخواني الطلاب

يانهار ازرق يا جدعان
علي فكره يا باشمهندس
انا لما احب انجح بنجح ولما احب اسقط بسقط
وحضرتك عارف عني ده كويس
انا بقي السنادي قررت اني انجح في الثلاثي المرح
الخرسانه - الاستيل - السويل
ومش مهم باقي الترم
وكمان حطيت في دماغي اجيب ماده امتياز
واجيب ماده جيد جدا
ونتيجتي تحمل الكثير من المفاجات وعلي فكره
نتجتي السنه اللي فاتت كانت
2 امتياز
3 جيد جدا
2 جيد
والباقي مقبول
ومعايا خرسانه

مش بقؤلك كله بمزاجي

ثم انا كنت متفائل بوجودك معايا في اللجنه بجد والله مش تثبيت

لان حضرتك تعتبر من المعيدين المقربين ليا واللي بعزهم معزه خاصه

واكن لهم كل التقدير والاحترام [b]

صادووووووووووووووووووووووووووووووه

لكي يقيس مدى فهم الطالب للنظري من خلال التطبيق

وعلي فكرة معظم الطلاب حلوا كويس


اهه شوفتوا يا جماعة ان الامتحان اه صعب بس الطلبة حلت كويس
بجد شوفوا الامتحان واحكموا عليه محدش يبص للطلبة ورد فعلهم كان ايه لان ممكن يكون الطالب اصلا كان رايح مش مذاكر كويس او محلش سؤال واحد و هاتك يا بكى لما حسسونى انهم هيسقطوا فى المادة

إهدى يا أحمد يا محرم خربت بيتنا و سيحت لنا و مش هانعرف نعمل حاجة تانى و كله هايجى عليك فى الأخر .
سيبك منه يا باشمهندس عبد الرحمن ده من النوع اللى يلاقى هيصة يروح مهيص معاها .
مادة القوانين من أسهل المواد الموجودة فى القسم و حتى المشروع بتاعها سهل جداً بس عيبها إن نصوص القوانين و المواد فيها كتير أوى و بتلخبط فى أرقامها و نصوصها و بتسبب إرتباك للناس اللى ملهاش قدرة كبيرة على الحفظ لأن للأسف النظرى بتاعها ملهوش حل غير كده

و كون إن فى ناس خلصت بدرى و طلعت و ناس قعدت للأخر ده طبيعى أنا طلعت بدرى بعد نص الوقت بحاجة بسيطة بس محلصلش عندنا بكاء و لا لطم فى وقتنا
و بعد كده اللى أنا شوفته كانت باشمهندسة واحدة بس كانت قاعدة قدامى هى اللى بكت مش ناس كتير زى ماأننتوا كاتبين ده اللى شوفته على مستوى بصرى

تصدقو كنت فاكر نفسي دخلت هندسة اكتشفت بعد الامتحان ده اني دخلت حقوق او تجارة مش متأكد بس اكيد بعد الامتحان الجاي هعرف انا دخلت انهو واحده فيهم اصل الواركنج كان رسم فمتأكدش بردو

وادى مارك اهه كمان كان شاهد على الامتحان وشاف ان الدفعة حلت كويس الحمد لله
مش عشان طالب او طالبة او عدد قليل اللى محلش يبقى الامتحان صعب و تعملوا كده
ده امتحان بيقيس مستوي الطالب عموما
حتى لو كان فى الحفظ
ده لازم دى قوانين لازم اى طالب فى قسم عمارة يبقى عارفها وحافظها زى اسمه
عشان لما هنتخرج من هشنروح ندور على منهج القوانين والتشريعات اه والله دانا اصلى نسيت ابعاد المنور المفروض نسبته تبقى كام بالنسبة للارتفاع
لازم تتحفظ
نفس الحكاية فى باقى اجزاء المادة
انا عن نفسي بكرة الحفظ جدا جدا
بس دى حاجات اساسية
وعموما اهى مادة وعدت على خير الحمد لله
يا ريت يركزوا فى باقى المواد اللى جاية وميفكروش فى اللى فات

لا للقوانين والتشريعات

معا ننظم حملة للاعتراض علي القوانين والتشريعات

معا نحو حياه افضل

بتطوير سياسه التعليم

والغاء المقررات التاليه

ومنها

الوريكنج - التصميم - القوانين والتشريعات - البيئه والمناخ - كل مواد مدني

نظرا لانها تضر بصحة الطالب

mohaamed zaki كتب:

انا ا قولك احنا وصلنا رابعه ازاي يا احمد مع ان انا لم اغش خالص لان اصلا مفبش حاجه تستاهل ان الواحد يغشش غشانها
اول حاجه الفكر المميز اللي ماشي بيه القسم ادى الى تطور الفصيص الايمن من الدماغ وقام بعمليه تنشيطه فتحولت من انسان فاهم الى بغبغان غبي بس اي دونت كار , لان مدام الهرم مقلوب اعتقد مش فارقه انك واقف في قمته او قاعه و او بمعنى اصح كانك واقف في دايره ومش عارف تقف في اي ركن , خلاصه الكلام التكرار بيعلم الحمار
تاني حاجه السكاشن الممتعه جدا ذات الاربع ساعات الممتعه جدا قامت بالقضاء على الفصيص الايسر تماما ونهائيا
المنهج العلمي الثابت من ايام جدو خفرع ومنقرع و مينا موحد القطرين
الدراسه باللغه العربيه اللي لها اكبر الاثر على تنميه المستوى العلمي
عدد الساعات العمليه اللى اكتر بكتير من النظريه و التي ادت الى بلوره الافكار والمنهج السليم
دي اسباب خلت الواحد يوصل لسنه رابعه وهو مطمن
على راي صاحبنا
اصحى ياهرم وفوق دنتا واقف ع بوزك
حاسب من الريشه تقف عليك وتنقطم رقبتك وينكسر بوزك
اصحى ياهرم و فوق و افردلنا بوزك
طلع خبايك متعنا بكنوزك
دا لولا العوزه مكنتش بصيت انا ف بوزك

نحن نتقدم بابداء الرأي الحر مع احترام الرأي الاخر

السلام عليكم
باشمهندس محمد
انا عاجبني انك ابديت رايك بصراحة ... ده شيئ جميل ... لكن مش موافقك في كتير جدا من رايك
بالنسبة لجملة (فتحولت من انسان فاهم الى بغبغان غبي بس اي دونت كار) بالتاكيد انت لو حاولت تفهم ها تفهم واللي بيدرس لك لابد هايقوم بمساعدتك على الفهم
بص يا محمد ... من وجهة نظر اعضاء هيئة التدريس ... او من وجهة نظري على الاقل ... انتم بتكتفوا بالقاء اللوم على الاخرين (القائمين بالتدريس) مع ان اغلب ردود افعالكم على طلبات القائمين بالتدريس معناها شيئ واحد : احنا عايزين ناخد درجات ونتخرج ... نبقى نفهم بعدين
محمد ... انا (عشت) في قسم عمارة في الجاممعة اللي كنت فيها في امريكا ايام الدكتوراه ... وكان معانا طلبة الماجستير وطلبة البكالريوس وشايفينهم بيشتغلوا ازاي
الفرق بين طالب العمارة في مصر وطالب العمارة في امريكا ان عندهم الطالب بياخد المشروع المطلوب منه في اي مادة سواء تصميم او تخطيط او تخطيط حضري او رسومات تنفيذية بجد ... بيدرس المشروع من جميع جوانبه ... لو بيعمل بحث بيكون بحث بجد عن المشروع ... ممكن يكون البحث شكله وحجمه اقل من البحث اللي بيعمله طالب عمارة هنا ... لكن بيستفاد من كل كلمة كتبها في البحث ... على عكس هنا الطالب كل اللي يهمه ان البحث يكون (مبهر) و (كبير) و(شكله يخض) ... لكن ساعة تفكيره في حل المشروع بينسى تماما انه يبص في البحث قبل التفكير
طالب العمارة هناك بيفكر بالاسابيع في مشروعه وبيسأل طوب الأرض في الشيئ اللي عايز يعرفه ... وبيفكر في المشاكل اللي في مشروعه بجدية ويضع لها حلول ... وفي نهاية الامر يقوم بـ (تبييض) المشروع في اربعة او خمسة ايام على اقصى تقدير ... ربما الاخراج بسيط في شكله لكن المضمون عميق في مستواه الفكري
انا حضرت بنفسي مناقشات الطلاب اثناء تقييم مشاريعهم ... كان الطالب بيعرض مشروعه بثقة كامله كانه مهندس كبير لانه فعلا فاهم كل شيئ عمله في المشروع ... ودرس فعلا جميع عناصرالمشروع ووصل فعلا لحلول لجميع المشاكل او المتطلبات المعمارية للمشروع
أما هنا في مصر ... الطالب بيفكر في مشاكل المشروع وبيضع فكرته للحل في يوم او يومين ... وربما في جلسة واحدة وعلى اقصى تقدير في اسبوع ويستغرق شهر في التبييض
هناك الطالب لما بيعمل فكرة (ابداعية) عبقرية في حل مشروعه ... بيكون درس انعكاس هذه الفكرة على مستعملى المبني ... اقصد بيكون درس بشكل محايد وبدون تحيز لفكرته انها فكرته ... بيدرس المتطلبات التقليدية الكلاسيكية للانسان داخل الفراغ اللي نتج من فكرته الابداعية ... اقصد انه مش بيكتفي ان الفكرة المعمارية تكون (مبهرة) في شكلها حتى لو كانت (فارغة) في مضمونها ومليئة بالسلبيات ... بالعكس ... بيحاول يخلق ايجابيات للفكرة في داخل هذا الفراغ اللي صممه ويعظم قيمة الايجابيات ومايجعلش (الشكل المبهر) مرتبط بـ (تنازل) عن احتياجات اساسية في المضمون
هنا ... اهم شيئ ان الفكرة تكون (مبهرة في شكلها) مش تكون (مبهرة شكلا ومضمونا) ولو ناقشت الطالب او لفتت نظره للسلبيات داخل هذه الفكرة كنوع من التوجيه في الاتجاه الصحيح وهو عدم الاكتفاء بالابهار بل يضاف للابهار ان يتوافق المبنى مع الاحتياجات الانسانية لمستعمليه وتادية الجانب الوظيفي والانشائي والمناخي ... الخ بشكل سليم بالاضافة إلى (الإبهار الشكلي) الطالب هنا يظن انك بتحارب الابداع


أما بالنسبة لكلمة ( التعليم بالعربي)... بص يا محمد .... انا عشت في جامعة روما في ايطاليا وكان معانا في نفس قسم العمارة طبعا طلبة مرحلة البكالريوس
كل الكتب عندهم بالايطالي ... كل المواد تدرس لهم بالايطالية ... وبالرغم من ذلك هم ليسوا متخلفين ... مستواهم العلمي والتحصيلي ليس منحدرا
ونفس الشيئ بالتاكيد هاتلقاه في المانيا وفرنسا و.... و..... وحتى دول اوروبا الشرقية
الفرق بيننا وبينهم ان مستوى الطالب هناك في اللغة الانجليزية اعلى من مستوى الطالب هنا ... ففي قراءة الكتب بالانجليزية الغير مترجمة الى لغة بلده مثل تايم سيفر مثلا الطالب هناك افضل من الطالب في مصر ... وهذا ليسابدا تقصيرا من القائمين بالتدريس في الجامعة هنا بل اظنه في مستوى اللغة عند الطالب ... لانه درس اللغة الانجليزية في ثانوي بنفس فلسفة : اخد درجات في المادة وبعدين اتعلم

محمد ....خليني اسالك سؤال
انا لو قلت لك معلومة علمية ... لاول مرة تعرفها ... بس قلتها لك بالعربي ،،،، ولو قلت لك نفس المعلومة بس باللغة الانجليزية .... ايه الفرق بين الاتنين في حصيلة المعلومات اللي في دماغك؟؟؟
يعني لو قلت لك مثلا : درجة غليان الماء 100 درجة مئوية
أو قلت لك
The water poils at 100 centigrade degrees
ايه الجديد في المعلومة التانية عن المعلومة الاولى؟؟؟
هل فيه فرق في حصيلة معلوماتك العلمية في الحالتين؟؟؟؟
أما عن فكرة زيادة عدد الساعات العملية عن النظرية ... فدي بالذات اكتر شيئ مرفوض من الطالب هنا انك تعطى له ساعات نظري ... اقصد محاضرات في مادة التصميم المعماري مثلا ... أو في مادة التصميمات التنفيذية على سبيل المثال
اسأل طلبة 3 السنة دي عن درجة تقبلهم لتلقي معلومات نظرية عن المادة قبل البدء في (الرسم المباشر) واعرف رايهم

عموما ... اتمنى ان الاحوال تنصلح للاحسن
وتمنياتي لك وللجميع بالتوفيق

السلام عليكم ورحمة الله وبركاته
د / هشام انا بشكر حضرتك على مشاركتك معانا المنتدى و مناقشة حضرتك فى رأى الطلاب

انا متفق جدا مع راي حضرتك مع العلم ان في نقطه تتاخد ضدي انا وهي ان انا ( مش هاوي عماره ) وفاقد الشيء لا يعطيه طبعا, اه الواحد اكيد لو كان جاه على نفسه وحاول يفهم كنت خلصت من زمان , بس انا بتكلم ع الطلبه اللي بتحب قسم عماره وهوا دا املهم وحلمهم , مش عارف ليه بحس انهم نسخ من بعض كله زي ما حضرتك بتقول بيفكر يا خد درجات لا اكتر ودي لواحدها كفيله بالقضاء ع عمليه الابداع لان هدفه الاول هنا تحصيل الدرجات مش تحصيل المعلومات لكن زي مافي مشاكل من الطلبه في مشاكل برضه من طريقه التدريس اللي بتعود الطالب ع الحفظ مش ع الفهم واللي بتبان من اسئله الامتحان
مثلا ماده زي الوركينج الامتحان بتاعها بيعتمد ع السرعه فقط طيب فين الفهم , هو مش من المفروض ابقى انا فاهم الوركينج كويس عشان اقدر انفذ اي حاجه انا اقدر اصممها يعني لو جاه في الامتحان اي رسمه لمثلا انشاءات خاصه او مبنى فيه مشكله تنفيذيه وانا من فهمي للوركينج احاول اطبقها برسم اسكتشات موضحه للحل مش يبقى الامتحان 6 ساعات ومعتمد على السرعه في عصر برامج الارشيكاد و الاوتوكاد

مثلا ف التصميم لما يجي ف الامتحان ارسم مشروع ايا كان نوعه هل من المنطقي ان اخلص كافه المطاليب ف الامتحان اكيد لو عملت كده هيطلع مشرووع اي كلام وعشان كده اللي بيحصل ان الطلبه بترسم نفس مشروعها هوا هوا ف الامتحان طيب ايه الفايده او تحفظ كام مشروع ترسمه ف الامتحان, يعني بدل ما بتفكر بتحفظ واللي بيحفظ بيجيب درجات اكتر
و انا لما اتكلمت عن النواحي العمليه فعلا انا شايف دي مهمه اوي بمعنى مينفعش ان اقعد اشرح الخطه للاعب كره القدم من غير ما امرنه التمرين اليومي والا مفيش فايده لان هنا انا بتحول من ممارس فعلي لهاوي ودي مشكه بتقابل كل الخريجين

اما اللغه الانجليزيه اه القسم مش مطالب بتعليم اللغه للطلبه مع انه لو المواد والدراسه بالانجليزي مدارك وا فق الطالب هتزيد لان ساعتها هيقدر يقرأ ابحاث اجنبيه وهيكون ع اتصال مباشر بكل ماهوا جديد وانا شايف ان النقطه دي مش محتاجه واحد كويس ف الانجليزي ولا حاجه دي عمليه تعود لان مواد مدني القوانين والرموز بالانجليزي والطلبه بتذاكرها برضه

المشكله اللي انا شايفها رئيسيه ان الواحد بعد ما قضى الوقت دا كله في قسم العماره هل هوا كفء للسوق الخارجي , هل الكليه فعلا قادره ع تأهيل طلبه عاليه المستوى, وليه الدراسه متكونش كورسات حره ع مدار السنه
عموما انا شايف المشكله مشكله بلد قبل ماتكون مشكله قسم
مشكله قوانين ونظم

عدل سابقا من قبل Dr. Hesham في 26/01/09, 12:47 pm عدل 2 مرات

واضح ان لايحه 97 هتطول السنادي واضح ان لايحه 97 هتدخل دور نوفمبرواضح ان لايحه 97  هيكونوا المغضوب عليهمواضح ان لايحه 97 مش هياخدوا لقب مهندسيارب لايحه 97 ترسي علي كده ومياخدوش مجلس تاديب اون لاين 

السلام عليكم ورحمه الله وبركاته اما بعدانا سعيد جدا بالحوار القائم خصوصا ان الدكتور هشام معانا النهارده انا بصراحه كنت متابع الموضوع من اوله لحد ما زكي دخل كتب الرد ده وكان رد صريح شويه واعتقد انه لازك يكون في توخي للحذر بعد كده في الرود بالنسبه للاعضاء الصغيرين بالذاتاما بالنسبه للدكتور هشام فانا قريت كلام سيادتك كله يا دكتور بصراحه والكلام جميل جدا وانا مقتنع بيه بشده بس انا هستاذن سيادتك في شئ صغير جدا  وهو اني عايز اثبت لحضرتك شئ بس والاثبات فعلي  مش نظري فياريت سيادتك تديني  فرصه بس وانا هجيب لحضرتك مفاجاه جميله جدا هتدعم كلام سيادتك كمان 

وعليكم السلام ورحمة الله وبركاته يا باشمهندس احمد محرم

انا واخد الموضوع بدون اي حساسية بالعكس انا لو غير كده كنت كلمت محمد زكي شخصيا ... وعلى فكرة انا ابتديت كلامي مع محمد زكي باني سعيد اني شفت واحد بيقول رأيه بصراحة ... ده منتداكم يا باشمهندسين واتكلموا قولوا اللي عايزين تقولوه بصراحة
ثانيا .. انا متشوق للمفاجأة اللي انت محضرها ... واكيد هاتكون حلوة طبعا
في الانتظار

شكرا ع المعلومات القيمه والفكر المتفتح من الدكتور هشام ويارب دايما الى الافضل
لان فعلا الدكتور هشام شخصيه مميزه و انا لما احتكيت به فتره لمست ذلك عن قرب
وعلى فكره انا كان نفسي اطبق حاجات كتير من الكلام اللي حضرتك قولته
لان لو الكلام اللي حضرتك قولته اتنفذ هيفرق كتير مع الواحد
بس اساسا المشكله اللي وقعنا فيها جيل او وقعت انا فيها شخصيا
1- سوء الاختيار ودي مشكله جيل بحاله متعودش انه يختار من وهو طفل صغير يعني انا لم اكن اتمنى ان اكون مهندسا لكن المجموع ايام الثاويه العامه هوا اللي دخلني
2- القدره على تغير الاختيار ( القدره ع اتخاذ قرار مصيري) ودا من اكتر الاسباب اللي الواحد عانا منها خصوصا انا انا كنت هسيب القسم فعليا اكتر من مره لكن طبعا رأي البيت بطرقه المختلفه بيخلي الواحد يجي ع نفسه ,وطبعا من وجهه نظرهم عندهم حق لان حاله البلد كلنا عارفينها واللي في ايده عصفور احسن من عشره ع الشجره
3 - عدم تحديد هدف و الاصرار عليه مهما كان حلمك , لو عندك اراده كل حاجه بتهون , انا كنت بقرا كتاب اسمه (the secret) وهوا بيتكلم عن قانون الجذب وعن كيفيه تحكمك بافكارك وان افكارك هي الي هتحققلك كل الي بتحلم بيه وازاي تقدر تغير افكارك السلبيه الى ايجابيه وفي ناس جربوا وطبقوا الكلام دا واتحقق اللي بيحلموا بيه ,بس الفكره هنا انك تصر ع الهدف اللي انت عايزه ومتقنعش نفسك انك وحش او سيء لان كل ما بتفكر كده بتزداد سوءا لا اراديا و دي نقطه مهمه, مثال على الكلام دا ان كان فيه موظف( ودي قصه حقيقيه ) وهوا ف طريقه للعمل يلاقي ناس بتضايقه ف الشارع , لما يكون ف الشغل دايما زمايله مش حبينه ومش متفاعلين معاه و على مشاكل دائمه مع رئيس العمل والمشكله هنا ان الموظف كان بيفكر تفكير سلبي من ناحيه كيف يراه المجتمع وكيف يراه زملاءه ف العمل ودايما كان بيشوف الجانب السلبي فقط وفعلا الراجل ده حاول يغير من نفسه وبالفعل بدأ يشوف الجوان بالايجابيه بس ويفكر تفكير ايجابي وكانت المفاجاه ان لما ينزل الشارع لا يتعرض لاي مضايقات وان علاقته بزمايله ف الشغل اتحسنت وعلاقته كمان مع رئيس العمل اتحسنت . ودي نقطه اتعرضت انا ليها شخصيا .

كفايه كده انا طولت عليكم

حصل خير يابوحميد
ورايي فعلا اني لو كنت مكانك اعمل بالمثل اللي بيقول
اذا لم تجد ما تحب ... فحب ماتجد

السلام عليكم
احب ارحب مره اخري بالدكتور العزيز علينا كلنا الدكتور هشام
واحب اقؤل لسيادتك ان المفاجاه
هتلاقيها علي الرابط ده
[ندعوك للتسجيل في المنتدى أو التعريف بنفسك لمعاينة هذا الرابط]
وهو استفتاء جميل جدا مستنين كلنا نتيجته في بعض الطلبه اللي دخلت وادلت بالاستفتاء وادنيا مستنين الباقي ان شاء الله
عن مهارات التعليم الاساسيه

السلام عليكم و رحمة الله و بركاته
أخواتي المعماريين
أرجو منكم كتاب القوانين و التشريعات e book
عاجل عاجل عاجل
للضرورة
و شكرا جزيلا

,و بالمناسبة المادة دي كانت ظريفة أوي

السلام عليكم ورحمة الله وبركاته وكل عام وانتم بخير بمناسبة بدء الترم الثاني وفقكم فيه الله سبحانه وتعالى لكل ماتحبون اما بعد:
انا اخوكم في الله محمود احمد عبد الحكيم بالفرقة الثالثة عمارة
اود ان اتحدث عن الامتحان لمادة القوانين والتشريعات ولكن قبل ان اتحدث فلدي حقيقة اود ان انقلها لسيادتكم وهي الاعتراف بكل الشكر والعرفان والتقدير والاحترام لكل القائمين على تدريس مادة القوانين والتشريعات وبالاخص المعيدين المهندس عبدالرحمن حسين واحمد حسني ومحمد نبيل وايمن سيـــــــــــد على المجهود الجبار الذي بذلوه ببراعة فائقه في استخدام الحنكة المثاليه في وصول المعلومات للطلاب بكفاءة عالية فجزاهم الله خير الجزاء وجعلهم زخرا للعلم والعطاء اما بالنسبة للامتحان فانا لا استطيع ان اقول ان الامتحان كان صعب ولكن الامتحان كان مفاجاة للجميع عن غير المتوقع عن باقي امتحانات الاعوام السابقة واختلاف الدكتور ايمن هاشم180 درجةفي وضعية الامتحان وارى من وجهة نظري ان زملائي وزميلاتي في الدفعه لا يبحثون الا عن التقدير في المادة فقط ولكن ليس للشعولر بالاستفادة منها في سوق العمل الجاد وهذا ما يجعلنا في تخلف مستمر ومن جيل العالم الثالث ومن ظل يمضي ليسكب في بوتقه الوهم ستسكب عليه في يوم من الايام ولن نرقى الى المستوى الذي يبحث عن الفكر الجاد فانا اقول بصراحة انني لم اجيب في تلك الامتحان بكفاءة عاليه وكله نصيب مقدر والحمد لله على كل
شئ مع انني راجعت المادة حفظ وتكنيك كامل ست مرات قبل الامتحان ولكن لتصادم المعلومات حدث ما حدث والحمد لله ولكني بصراحة استفدت استفادة شسقة من تلك الماده وبرغم فشلي داخل القسم وعدم تحقيق المطلوب ولكني اقول الحمد لله على كل شئ واعلم بان الله لن يترك عبده وانه يتظرني مستقبل حافل بالخيرات باذن الله وبما ينفع امه محمد بالخير واليمن بلذن الله تعالى
لكم مني جزيل الشكر والعرفان