جعلونى تافهاَ

أيادى خفيه تعبث فى الظلام

– أيه قلة الأدب دى من أولها –

أيادى خفيه هى من تقوم بحياكه

– حلوه حياكه دى –

تلك المؤامره ضدى

• مؤامره أيه وبتاع أيه ؟ .. ياعم إنت عندك بارانويا

• بارانويا أيه يا حمار ؟ .. تفهم أيه أنت فى الطب النفسى والكلام الكبير ده إتنيل على عينك وأسكت

• أفهم أيه فى الطب النفسى ؟! .. أنا أفهم أحسن منك ومن أحمد عكاشه شخصياَ .. يا أبنى أنا مريض نفسياَ .. إسئلنى أنا

• خلاص .. خلاص ، أسكت بأه خلينى أكمل كتابه .. كنا بنقول أيه ؟ آآه المؤامره ..

جعلونى تافهاَ

• يا أبنى ماأنت طول عمرك تافه ..
أيه الجديد يعنى ؟

• مش قلت لك إنك حمار ..
أنا عمرى ماكنت تافه ..
قوللى ليه ؟

• ليه يا نجم ؟

• لأن التافه عمره ما عرف إنه تافه ..
التافه بيبقى متكيف مع تفاهته ..
معندوش مشكله ..
مفيش حاجه مضيقاه ..
عشان كده هو تافه

• تصدق عندك حق ...
ماأنت طلعت بتفهم أهه ..
طيب يا سيدى مين بقى دول اللى جعلوك تافه ؟

• كل حاجه فى الدنيا بتدفعنى أنى أكون تافه
.. أو أتجنن ..
إنت ما بتبصش حواليك ولا أيه ؟ ..
إفتح الجرنان .. إفتح

إتفضل
ياسيدى .. صباح التهييس ..
ناس غرقت وناس طلع عين أبوهم 72 ساعه فى الميه
عشان واحد معاه حصانه (عضو مجلس شورى) عايز يقبض التأمين على عبّاره شغاله
بقالها 36 سنه فموت 1200 واحد ، لأ وبعد كل ده لسّه بيفاصلوا فى التعويضات

حوادث

القطارات ..
كل اسبوع فيه حادثه وناس تموت وناس تتحرق والحكومه تصرف
تعويضات ووعود بمحاسبه المسئول محاسبه رادعه ..
ووزير النقل يقدم استقالته
.. ويرفضوها !!

الموضوع ده بيفكرنى بفؤاد المهندس فى مسرحيه
سك على بناتك
قاللك :
"ودخلت السونا أدوّر على المأذون وكل شويه أحسس وأعتذر ..
أحسس وأعتذر" ..
أهي الحكومه كده

لأ وشوف الكوميديا ..

ناس خايفه من أنفلونزا الطيور
اللى هى مموته بتاع 100 واحد بس على مستوى العالم كله ..

آل أيه ..
جابوا ميه معدنيه يستحموا بيها
عشان فى إشاعه طلعت إن فى وزه
عيانه وقعت فى النيل فلوّثته

• يا عم .. أرزااق .. رزق بتوع الميه المعدنيه

• طيب يا سيدى أرزاق ..
و شعبان عبد الرحيم ..
أرزاق،
و روبى ..
أرزاق،
و عمرو سماكه ..
أرزاق،

و محمدعطيه .. أرزاق

• محمد عطيه ..
إبن حلال ..
فكرتنى ..
معاد "ستار أكاديمى" ،

دا "خليفه" و"مايا" النهارده نومينييز

• نومى- أيه يا روح خالتك ؟

• نومينييز .. يعنى واحد منهم هيطلع بره

• إتفضل يا سيدى ..

"الله يرحم جدّك اللى كان بيركب عالحمار ويبدّل برجليه"

أديك إنت أهه واحد من ضحايا المؤامره

•
إتفرج إنت بس ..
هاتعجبك أوى ..
أنا كنت زيّك كده فى الأول ،
وبعد كده إتعودت ..
فى الأول هاتستغرب ،
هما ليه مأضّينها أوى كده،
ولاد مع بنات 24 ساعه ..
آخر سبهلله ،
ومش عارف مين بتحب مين ،
ومين زعلان عشان مين خرجت ،
ومين هايسافر اسبوع المجر
عشان يحضر حفله للفريق اللى بيحبه مكافأه ليه
عشان طلع أتفه واحد الأسبوع ده

،فباقى البنات بتبوسه عشان تودّعه –
على فكره أسمه فادى من فلسطين !! –

بس .. يوميين تلاته كده وهتلاقى نفسك
بتحبهم ومتأثر بيهم و مش بعيد تصوّت للواد بتاع مصر

• آه وأفتح أى قناه أغانى ..
هتلاقى ناس فضياااااااااااه
و معاها فلوس بالعبيط ..
"أمير زحلان بيمسّى على فتاه المنيره" ..
" جميله العتبه تبحث عن حب صادق" ..
"البرنس بيحب نوسه موووووووت" ..
24 ساعه كده ..
طبعاّ بغض النظر عن محتوى الأغانى

تسيبك من الأغانى وتقول هاشوف أى حاجه تانيه ،
تلاقى آبليتك "هاله شو" مستضيفه واحد معفن
وعماله تتكلم معاه عن
دوره العظيم فى فيلمه الأخير اللى حقق 25 مليون جنيه ،
عشان هو راجل فنان
و المخرج راجل فنان
وسامى العدل راجل فنان
والجمهور هو اللى أبن كلب حمار ودخل الفيلم

وأنا اللى أبن كلب بهيم مش بفهم فى الفن
و لا فى الكوره عشان كده طلعت حته
مهندس

( والصراحه راحه يا روحى .. إنت مابتعرفش )

تقفل التليفزيون
وتسيبك من الجرنان
والكمبيوتر اللى مهنّج وتقعد فى حالك ..
كافى خيرك شرك ..
تلاقى حد جاى يشتغلك
أخوك عايز يذاكر ومابيحبش حد يقعد معاه فى الأوضه
عشان بيتلخم

أمك فاضيه ،
وجايه تاكلك دماغك فى أى موضوع مالكش فيه ..
خضار ..
كبرت ولازم تتجوز ..
أخوك مابيتصلش ..
أختك شكلها عيانه ..
أى حوار
على رأى سامى سرحان فى فيلم
"الناظر"
:"هاتشوفك هاتشوفك"

أو أبوك يظروفك كلمتين مالهمش لازمه :

"مش تدخل تذاكرلك كلمتين يمكن تنجح السنه دى" ..

"مش تدورلك على شغلانه بدل ماأنت قاعد كده" ..

"مش تروح تزور جوز عمتك اللى عامل عمليّه اللوز من 6 أشهر" ..

"طيب إنزل هات مش عارف أيه"

تضطر آسفاَ إنك تسيبلهم البيت وتنزل تتسرمح فى الشوارع ..

وعندك كذا أختيار

لو معاك فلوس

تروح كافيه تافه ..
تقعد مع ناس تافهه تتكلموا كلام نسوان ،

وتأكل شوكلات كيك وتشيّش طبعاَ وتضيعلك كام ساعه

تروح سينما ..
تتفرج على الممثل العظيم اللى إنت لسّه شايفه مع هاله شو

تروح ديسكو
– ما بتعرفش ترقص/ مابتحبش –
أقعد إتفرج على البنات

ممكن تجيب حشيش وتقضيها ..

ممكن حريم كمان

لو مش معاك فلوس

ممكن تتبرشط على حد معاه

تقعد على قهوه حقيره ..

تعمل نفس الحاجات اللى كنت هتعملها فى الكافيه
بس مافيش شوكلات كيك ..
ممكن كمان تلعب إستيميشين ..
أحسن حاجه تضيّع الوقت
ممكن تلعب بلاى ستيشين
ممكن تتسنكح مع صاحبتك ..

لو عندك

لو ليك فى الحريم ..
ممكن تجيب حريم ..

لو معاك فلوس و عندك موكنه

لو ليك فى الحريم ومالكش فى الحرام ..

ممكن تأضيها حب وحركات
وحكايات و "أسامه منير" ..
أهه تضيع وقت برضه

لو مالكش فى الحريم ولا الحرام ..
يبقى إنت محترم ..
كده يبقى إنت فى خطر

تبتدى تنوّر أحمر ..
فالناس بتوع الأيدى الخفيه
– فاكرهم –

ياكلولك دماغك

• إزاى ؟

•
ستات ماشيه فى الشارع لابسه من غير هدوم ..

ستات محجبّه ماشيه فى الشارع
برضه لابسه من غير هدوم
– دى تغيظك أكثر –

شاب سنتيح ماشى مع واحده سنتيحه

ومقضينها فى الشارع

• يا سيدى .. إعمل مش من هنا

• شوفت ..
أديك بدأت تتعود ..

جعلوك تافهاّ أو ( .… )

• طيب ياعم ..

أنا تافه و ( .... ) ،

إنت عملت أيه ؟

• ولا حاجه .. جعلونى تافها

• طيب ، ما تغيير حياتك ؟

•
ما بتتغيرش ..

عشان تتغير لازم تقدر تتحكم فيها ..

وعشان تتحكم فيها لازم
تبقى حرّ ..

وعشان تبقى حرّ لازم تبقى حاجه ..

حاجه ومعاك فلوس

• ما تبقى حاجه

• مش بقوللك إنك حمار ..

عشان تبقى حاجه لازم تتعلم وتشتغل وبعد كده تبدع

• تتعلم ؟! ..

فى بلدنا دى صعب ..

بس إفترض إنك إتعلمت

• دوّر بقى على شغل ..

هييييييييييييييييه .. حللنى

• إيه ده لقييت شغل ؟!

• إستنى ، إنت رايح فيين ..

فيه جيش إنت نسيت ولا أيه ؟

المؤامره ..

ماتقولش بارانويا ..

إيه عااادى جيش عندك جيش

• إلا بالمناسبه صحيح ..

هو علاء وجمال مبارك دخلوا الجيش ؟

• يا عم وإنت مالك ؟ ..

إنت أبوك ريّس ؟ ..

إتنيل أسكت وخليك فى اللى أنت فيه

• طيب .. OK الصبر من عندك يا رب ..

آدى سنه وراحت

• ممكن ثلاثه ..

بلاش التفائل اللى عندك ده

• تلاته .. تلاته ..

كلله بيعدّى ..

خلاص .. خلصتهم

• أيه ده بالسرعه دى ؟

• سرعه أيه ؟! ..

أنا عندى 26 سنه ..

مش فاكر حاجه من اللى أتعلمته

ولسه هابتدى حياتى من تحت الصفر

• خلاص دوّر على شغل تانى

• أه بس المره دى ..

حللنى بجد

• ليه ياعم ؟

• عادى يعنى ..

إنت نسيت اللى إتعلمته ..

وعدد السكان زاد ..

يبقى عدد الطلبه زاد ..

يبقى البطاله زادت ..

يبقى فرص العمل قلّت

• لا يا عم ربّك كريم ..

قادر يرزقنى

• طيب ..

عشان البق الحلو ده ..

أديك لقيت شغل بمرتب كويس كمان 1500 جنيه

• أيه ؟

• إحمد ربنا ..

إنت طايل

• أيوه بس

• شششششششش .. إدخل إشتغل

• أيوه بس الشغلانه دى مش تخصصى ..

مش حبيبها ..
مش

• أوعى تتبطّر على النعمه ..

أوعى ..

إنت كنت من سطرين قاعد صايع ..

قوام بقيت تقول مش و بس و تش

• طيب .. بس المرتب

• ماله ؟

• شغال ..

بس هفضل مأضّيها كده على طول ؟ ..

مش هتجوز بقى ولا أيه ؟

• تت-أيه ؟! ..

إنت عبيط يا أبنى ولا ايه ؟ ..

أيه الكلام الكبير ده

• كبير أيه يا عم ..

أنا اللى بقيت كبير ..

أنا عندى 28 سنه

• وماله ..

سن النضج

• نضج أيه يا عم ؟! ..

أنا عفّنت على الشجره

• مهو جواز فى الظروف دى صعب ..

المفروض تجيب شقّه ،

ويبقى عندك دخل ثابت عشان تعرف تعيش

• وده هيحصل إمتى بقى إن شاء الله ؟

• خللى عندك أمل ..

إنت مش مؤمن ولا أيه ؟

• آآه ..

إنت كمان هتكفرنى ؟ ..

إشطه

• ممكن دلوقتى تنسى موضوع الجواز ده شويّه ..

قضّيها

• أيوه .. أزاى يعنى ؟

• حريم و حشيش ..

كده يعنى ..

قضّيها يا عم

• كنت قضّيتها زمان لمّا هقضّيها دلوقتى ..

ماينفعش

• أيه ده يله ؟! ..

تصدّق إنك طلعت محترم

• طيب ما أنا عارف ..

وبعدين ؟

• مش عارف ..

بس مش ملاحظ حاجه ؟

• أيه ؟

• إن موضوع محترم ده هو اللى مودّيك فى داهيه

• أيه ده ..

أنت بقيت تتكلّم زيّهم أهه

• هما مين دول ؟

• الأيدى الخفيه ..



المؤامره ..




إنت كمان طلعت شريك فى المؤامره حتى إنت ؟

• أنا مين يا عم !! ..

إنت بتكلم نفسك

•
أه صحيح ..

أنا عمال أكلم نفسى من الصبح ..

يبقى أنا كمان شريك فى


المؤامره ..


يعنى أنا السبب فى الأخر ..

طيييييب أهه .. آآآآآآآه



ناس معرفهمش ..

الظاهر جيراننا : يا عينى يا أبنى ..

مات فى عز شبابه ..

ونبى كان كويس و أبن حلال ..

"إن لله وإن إليه راجعون"



وحدووووووووووووووه ..

لا إله إلا الله

صوت من بعييييييييد :


الصراحه راحه يا روحى .. إنت مابتعرفش

تحياتى الحارة يارب الموضوع يكون عجبكم

عدل سابقا من قبل ABOEL7ASSAN في 11/12/08, 12:30 am عدل 1 مرات

كدا يبقى انت فهمت التيته و اللى هى انك ف مصر
و طبعا كلنا عارفين المقوله الشهيره و مؤمنين بيها اللى هى لو نيلك يا مصر صلصه موش قيكفى الكوسه اللى فيكى
يعنى الخلاصه لو مقضيها و سايط هتعرف تخرج من الجيش و تشتغل شغلانه محترمه و ليها دخل ثابت و تبقى قيمه و سيمه و اى بنت ترضى تتجوزك و بس و تعيش و تموت ف نفس الحال و لا تكون عملت حاجه عليها القيمه ف الدنيا دى
و بس
و بعدين بلاش تشكك ان علاء و جمال دخلو الجيش اكيد دخلو انت بتكلم ف ايه
و السلاااااااااااااااااام ختام

موضوع بجد جاااااااااااااااااااامد.....مجمل اللي بيحصل في بلدنا في كام سطر ربنا يستر على شبابنا ولاد وبنات ويهديهم ويبعدهم عن المؤامرة دي........!!!!!!



شكرا بجد على الموضوع,,

والله يا حسن انا حاسس انك تقصدني بالموضوع الجامد ده
وهي الدنيا كدة في زمنا دة يا حسن
اما مهر) و)
وهو ان يكو ن معاك فلوس عشان تدفعها رشوة عشان تشتغل في مكان كويس
اوضهر
يكونلك واحد قريب من الناس المهمين

والله فعلا ربنا يكون فى عون الشباب بالخصوص
شايلين هم على طول الا فى حالات خاصة طبعا كلنا عارفينها(دادى ومامى) والكلام الجامد ده
وشكرا يابشمهندس عالموضوع الجميل ده

انت كده جيت ع الجرح يا صاحبى

الوتر الحساس يعنى